បន្ទាប់ពីសម្រាកប្រមាណ ៣ ខែ ការប្រកួតជម្រើសជើងឯក ខេមបូឌានព្រីមៀរលីគ នឹងត្រឡប់មកវិញនៅចុងសប្តាហ៍នេះ ពោលគឺចាប់ពីថ្ងៃទី៥ ខែកញ្ញា ឆ្នាំ២០២៦ តទៅ ខណៈរដូវកាលថ្មីនេះ ត្រូវបានរំពឹងថានឹងមានការប្រកួតប្រជែងកាន់តែខ្លាំង និងទាក់ទាញការចាប់អារម្មណ៍ពីអ្នកគាំទ្របាល់ទាត់កម្ពុជាជាថ្មី។

សម្រាប់សប្តាហ៍បើកឆាក នៃរដូវកាល ២០២៦/២៧ នឹងមានការប្រកួតចំនួន ៥ គូ ដែលនឹងធ្វើឡើងនៅថ្ងៃទី៥ និងទី៦ ខែកញ្ញា ឆ្នាំ២០២៦ ដោយក្រុមនីមួយៗនឹងចាប់ផ្តើមដំណើររបស់ខ្លួនក្នុងការប្រជែងដណ្តើមពិន្ទុ និងតំណែងជើងឯកសម្រាប់រដូវកាលថ្មីនេះ។

ជាមួយនឹងការវិលត្រឡប់មកវិញនៃការប្រកួត ខេមបូឌានព្រីមៀរលីគ ក៏នឹងបន្តផ្តល់ភាពងាយស្រួលដល់អ្នកគាំទ្រក្នុងការទស្សនាការប្រកួតតាមរយៈ CPL+។ ទស្សនិកជនអាចទស្សនាការប្រកួត ខេមបូឌានព្រីមៀរលីគ ទាំងអស់តាមរយៈគេហទំព័រ និងវេទិកា CPL+។

ជាពិសេស អ្នកគាំទ្រអាចទទួលបានឱកាស ទស្សនា CPL+ ដោយឥតគិតថ្លៃរយៈពេល ១ ខែពេញ ដែលជាឱកាសសម្រាប់អ្នកគាំទ្រទទួលបានបទពិសោធន៍ទស្សនាការប្រកួត និងស្វែងយល់ពីសេវាកម្ម CPL+ មុននឹងជ្រើសរើសកញ្ចប់សម្រាប់ការទស្សនារយៈពេលវែង។

សម្រាប់តម្លៃសេវាកម្ម CPL+ មាន ៣ ជម្រើស ដែលជាម្រើសនៅក្នុងប្រទេសកម្ពុជា ៖
១. ទស្សនា ១ ប្រកួត តម្លៃ ១,០០០ រៀល (ប្រមាណ $0.25)
២. កញ្ចប់ ៣ ខែ តម្លៃ ៣៦,០០០ រៀល ($9)
៣. កញ្ចប់ពេញមួយរដូវកាល តម្លៃ ១០០,០០០ រៀល ($25)

គួរឱ្យដឹងផងដែរថា សម្រាប់រដូវកាល ២០២៦/២៧ នៃការប្រកួតជម្រើសជើងឯក ខេមបូឌានព្រីមៀរលីគ នៅតែមានក្លិបចំនួន ១១ ចូលរួមប្រកួតប្រជែងដូចរដូវកាលមុន រួមមាន៖ អង្គរថាយហ្គឺរ, បឹងកេត, អាយ អេស អាយ ដង្កោសែនជ័យ, គិរីវង់សុខសែនជ័យ, អឹម អូ អាយ កំពង់ដេវ៉ា, ណាហ្គាវើលដ៍, ភ្នំពេញក្រោន, ព្រះខ័នរាជស្វាយរៀង, កងយោធពលខេមរភូមិន្ទ, ឡាយហ្វ ខេត្តព្រះសីហនុ និង វិសាខា៕