ព្រះខ័នរាជស្វាយរៀង និង ភ្នំពេញក្រោន នឹងចាប់ផ្តើមយុទ្ធនាការរបស់ខ្លួនក្នុងវគ្គចែកពូល AFC Champions League Two 2026/27 នៅថ្ងៃទី ១៧ ខែកញ្ញា ឆ្នាំ២០២៦ ដោយក្រុមទាំងពីរត្រូវប្រឈមមុខនឹងគូប្រជែងផ្សេងគ្នា ក្នុងការប្រកួតបើកឆាក។

ស្វាយរៀង ស្ថិតក្នុងពូល G ជាមួយ ម៉ាជីដា អេហ្វស៊ី, សៀងសៃ សិនហ៊ូ និង តាំផាយ៉ូវើរ។ ដូច្នេះ ការប្រកួតបើកឆាក ព្រះខ័នរាជស្វាយរៀង នឹងត្រូវធ្វើដំណើរទៅប្រទេសជប៉ុន ដើម្បីជួប ម៉ាជីដា អេហ្វស៊ី នៅកីឡដ្ឋានម៉ាជីដា វេលាម៉ោង ៧:០០ យប់ (ម៉ោងនៅកម្ពុជា)។ វានឹងក្លាយជាការសាកល្បងសំខាន់សម្រាប់ក្រុមតំណាងកម្ពុជា ក្នុងការប្រជែងយកពិន្ទុពីការប្រកួតក្រៅដី។

ចំណែក ភ្នំពេញក្រោន ស្ថិតក្នុងពូល H ជាមួយ កាំងវ៉ុន អេហ្វស៊ី, គូជីង ស៊ីធី អេហ្វស៊ី និង គីតឈី អេសស៊ី ដោយបើកទ្វារផ្ទះទទួល គូជីង ស៊ីធី អេហ្វស៊ី នៅ ពហុកីឡដ្ឋានជាតិមរតកតេជោ វេលាម៉ោង ៧:១៥ នាទីយប់។

ការប្រកួតទាំងពីរ នឹងក្លាយជាឱកាសដ៏ល្អសម្រាប់ក្លិបកម្ពុជា ក្នុងការវាស់ស្ទង់សមត្ថភាពជាមួយក្រុមមកពីបណ្តាប្រទេសខ្លាំងផ្សេងៗនៅអាស៊ី ខណៈការប្រកួតនីមួយៗក៏មានសារៈសំខាន់សម្រាប់ការប្រជែងកៅអីទៅវគ្គបន្ទាប់។

​

សម្រាប់អ្នកគាំទ្របាល់ទាត់កម្ពុជា ការប្រកួតថ្ងៃទី ១៧ ខែកញ្ញា នឹងក្លាយជារាត្រីសំខាន់មួយ ខណៈក្រុមតំណាងកម្ពុជា ទាំងពីរ ត្រូវចាប់ផ្តើមដំណើររបស់ខ្លួនក្នុងការប្រជែងលើឆាកក្លិបអាស៊ី។

តើ ស្វាយរៀង អាចយកពិន្ទុពីជប៉ុនបានឬទេ? ហើយ ភ្នំពេញក្រោន អាចប្រើប្រាស់អត្ថប្រយោជន៍ក្នុងទឹកដី ដើម្បីបើកឆាកជាមួយលទ្ធផលល្អបានដែរឬយ៉ាងណា?