ការប្រកួតពានរង្វាន់ អ៊ី-ខេមបូឌានព្រីមៀរលីគ រដូវកាល ២០២៥/២៦ បានបញ្ចប់ដោយជោគជ័យ កាលពីថ្ងៃទី១០ ខែកុម្ភៈ ឆ្នាំ២០២៦។ បន្ទាប់ពីប្រកួតរយៈពេល ១១ សប្ដាហ៍ រួមទាំងវគ្គជម្រុះ Top 6 និងវគ្គផ្តាច់ព្រ័ត, គណៈកម្មការរៀបចំការប្រកួត បានរកឃើញហើយ ម្ចាស់ជើងឯក, ជើងឯករង, ក្រុមចំណាត់ថ្នាក់ទី៣, កីឡាករល្អបំផុត និងកីឡាករដែលរកគ្រាប់បាល់ច្រើនបំផុត ក្នុងវិញ្ញាសាតេឡេបញ្ជា។

ក្រោយពីខិតខំហ្វឹកហាត់ និងបង្ហាញសមត្ថភាពយ៉ាងល្អ និងមិនបន្ទូរដៃដល់គូរប្រកួត, ខេម សុងហៃ មកពីក្លឹប បឹងកេត បានក្លាយជាម្ចាស់ជើងឯក អ៊ី-ខេមបូឌានព្រីមៀរលីគ រដូវកាល ២០២៥/២៦ លើវិញ្ញាសាតេឡេបញ្ជា។ ជើងឯករង ដណ្ដើមបាន ដោយកីឡាករ ភោគ សុបញ្ញា មកពីក្លឹប ព្រះខ័នរាជស្វាយរៀង ខណៈ ចំណាត់ថ្នាក់ទី៣ គឺ តាំង គីមសុង ពីក្លឹប អឹមអូអាយ កំពង់ដេវ៉ា។

ទោះបីជា ទឹម វង្សរ៉ាវុធ មកពីក្លឹប ណាហ្គាវើលដ៍ មិនអាចការពារដំណែង ម្ចាស់ពានរង្វាន់ពីររដូវកាលក៏ដោយ ក៏រូបគេបានក្លាយជា កីឡាករល្អបំផុត និងកីឡាករដែលរកគ្រាប់បាល់ច្រើនបំផុត ប្រចាំរដូវកាល ២០២៥/២៦ ដែរ។

គូរឱ្យដឹងផងដែរថា រដូវកាលនេះ មានក្លឹបចូលរួមសរុប ៩ ក្លឹប រួមមាន៖ ណាហ្គាវើលដ៍, បឹងកេត, អឹមអូអាយ កំពង់ដេវ៉ា, ព្រះខ័នរាជស្វាយរៀង, ភ្នំពេញក្រោន, អង្គរថាយហ្គឺរ, អាយ អេស អាយ ដង្កោសែនជ័យ, វិសាខា និងកងយោធពលខេមរភូមិន្ទ។

ចំណែកឯ ការប្រកួតប្រព្រឹត្តទៅតាមប្រព័ន្ធសន្សំពិន្ទុ, ក្រុម Top 6 ដែលមានពិន្ទុខ្ពស់ជាងគេ ត្រូវជួបគ្នានៅវគ្គជម្រុះ (Play-off)។ ក្រុមឈ្នះ Play-off នឹងឡើងទៅ Upper Bracket ខណៈក្រុមដែលចាញ់ នឹងបន្តប្រកួតនៅ Lower Bracket។ ក្រុមចាញ់នៅ Upper Bracket នឹងធ្លាក់ទៅ Lower Bracket, ខណៈក្រុមចាញ់នៅ Lower Bracket នឹងបញ្ចប់ដំណើរការប្រកួត។ រូបមន្តនេះប្រើសម្រាប់ ទាំងវិញ្ញាសាតេឡេបញ្ជា និងទូរសព្ទ។ វគ្គដណ្ដើមជើងឯក ឈ្នះ Upper Bracket Final ត្រូវប្រកួតជាមួយឈ្នះ Lower Bracket Final ដើម្បីកំណត់ ម្ចាស់ជើងឯករដូវកាល ២០២៥/២៦ ជាផ្លូវការ។

សូមជម្រាបថា នេះគឺជារដូវកាលទី៣ហើយ ការប្រកួត អ៊ី-ខេមបូឌានព្រីមៀរលីគ នៃវិញ្ញាសាតេឡេបញ្ជា ហើយវិញ្ញាសាទូរសព្ទត្រូវបានបញ្ចូលក្នុងរដូវកាលនេះលើកដំបូង។ សូមរំឭកថា ម្ចាស់ជើងឯក អ៊ីខេមបូឌានព្រីមៀរលីគ រដូវកាលទី១ ឆ្នាំ២០២៣-២៤ និងរដូវកាលឆ្នាំ២០២៤-២៥ ម្ចាស់ជើងឯក បានទៅលើកីឡាករ ទឹម វង្សរ៉ាវុទ្ធ (Tim Vongravuth) ៕