ការប្រកួត ពានរង្វាន់ អ៊ី-ខេមបូឌានព្រីមៀរលីគ រដូវកាល ២០២៥/២៦ ត្រូវបានបិទបញ្ចប់ដោយជោគជ័យ កាលពីថ្ងៃទី១០ ខែកុម្ភៈ ឆ្នាំ២០២៦។ ក្នុងរយៈពេលប្រកួតសរុប១១សប្ដាហ៍, ឈានដល់ការប្រកួតជម្រុះវគ្គក្រុមកំពូលតារាងទាំង៦ #Top6 និងការប្រកួតវគ្គផ្តាច់ព្រ័តផងកាលពីម្សិលមិញនេះ គណៈកម្មការរៀបចំការប្រកួត បានរកឃើញហើយ ម្ចាស់ជើងឯក, ជើងឯករង, ក្រុមចំណាត់ថ្នាក់លេខបី, កីឡាករល្អប្រចាំរដូវកាល និងកីឡាករដែលរកគ្រាប់បាល់បានច្រើនជាងគេបំផុត នៅលើវិញ្ញាសាទូរសព្ទដៃ។

សម្រាប់វិញ្ញាសាទូរសព្ទដៃ កីឡាករ រី សក្តា មកពីក្លិប ព្រះខ័នរាជស្វាយរៀង បានក្លាយជាម្ចាស់ជើងឯកប្រចាំរដូវកាល ២០២៥/២៦។ ខណៈជើងឯករងបានទៅលើ កីឡាករ ម៉ាត់ រ៉ាហ្សាក់ មកពីក្លិប អឹម អូ អាយ កំពង់ដេវ៉ា និងចំណាត់ថ្នាក់លេខ៣ បានទៅលើ ទឹម រិទ្ធីស័ក្តិ មកពីក្លិប ណាហ្គាវើលដ៍។

រី សក្តា, កីឡាករ ព្រះខ័នរាជស្វាយរៀង (ម្ចាស់ពានរង្វាន់ អុី-ខេមបូឌានព្រីមៀរលីគ ឆ្នាំ២០២៥/២៦) 

ម៉ាត់ រ៉ាហ្សាក់, កីឡាករ អឹម អូ អាយ កំពង់ដេវ៉ា ( ម្ចាស់ពានរង្វាន់រង និង រកគ្រាប់បាល់ច្រើនបំផុត) 

ទឹម រិទ្ធីស័ក្តិ,  កីឡាករ ណាហ្គាវើដល៍ ( ជ័យលាភី លេខបី) 

គួរឱ្យកត់សម្គាល់ថា ការខិតខំប្រឹងប្រែងរបស់ ម៉ាត់ រ៉ាហ្សាក់ មិនត្រឹមតែជួយឱ្យរូបគេទទួលបានតំណែងជើងឯករងប៉ុណ្ណោះទេ ប៉ុន្តែថែមទាំងក្លាយជាកីឡាករដែលរកគ្រាប់បាល់បានច្រើនជាងគេប្រចាំរដូវកាលផងដែរ។ ចំណែក តាំង វិសាល មកពីក្លិបកងយោធពលខេមរភូមិន្ទ ត្រូវបានជ្រើសរើសជាកីឡាករល្អជាងគេប្រចាំរដូវកាល លើវិញ្ញាសាទូរសព្ទដៃ។

តាំង វិសាល, កីឡាករ កងយោធពល ខេមរភូមិន្ទ ( កីឡាករ ល្អជាងគេ) 

សូមជម្រាបផងដែរថា ការប្រកួត អុី-ខេមបូឌានព្រីមៀរលីគ រដូវកាល ២០២៥/២៦ មានក្លិបចូលរួមសរុប ៩ក្លិបរួមមាន៖ ណាហ្គាវើលដ៍, បឹងកេត, អឹមអូអាយ កំពង់ដេវ៉ា, ព្រះខ័នរាជស្វាយរៀង, ភ្នំពេញក្រោន, អង្គរថាយហ្គឺរ, អាយ អេស អាយ ដង្កោសែនជ័យ, វិសាខា និងកងយោធពលខេមរភូមិន្ទ។ 

គិតមកដល់ពេលនេះ ការប្រកួត ពានរង្វាន់ អុី-ខេមបូឌានព្រីមៀរលីគ បានដំណើរការចូលរដូវកាលទី៣ ហើយ។ ជាពិសេស វិញ្ញាសាទូរសព្ទដៃ ត្រូវបានបញ្ចូលជាលើកដំបូងនៅក្នុងរដូវកាលទី៣នេះ គឺរដូវកាល ២០២៥/២៦៕