ការប្រកួតពានរង្វាន់កីឡាអេឡិចត្រូនិចកម្ពុជា អ៉ីខេមបូឌានព្រីមៀរលីគ រដូវកាលឆ្នាំ២០២៥-២៦ ឈានដល់សប្តាហ៍ទី១១ហើយ នៅថ្ងៃទី ៣០ ខែមករា ឆ្នាំ២០២៦ ចុងសប្ដាហ៍នេះ ហើយក៏សប្ដាហ៍ចុងក្រោយនៃការប្រកួតសន្សំពិន្ទុ មុនឈានទៅរកឃើញក្រុមខ្លាំងទាំង៦ ឡើងទៅកាន់វគ្គផ្ដាច់ព្រ័ត្រ។

បន្ទាប់ពីបញ្ចប់ការប្រកួត សប្ដាហ៍ទី១០ (Console) តារាងពិន្ទុ អ៊ីខេមបូឌានព្រីមៀរលីគបានចាប់ផ្តើមបង្ហាញភាពច្បាស់លាស់ សម្រាប់ការប្រជែងកៅអី ៦ ក្រុមចុងក្រោយ ដែលនឹងមានសិទ្ធិឡើងទៅកាន់ វគ្គផ្ដាច់ព្រ័ត្រ។ បច្ចុប្បន្ន មានក្រុមដូចជា ណាហ្គាវើលដ៏, បឹងកេត, អឹមអូអាយ កំពង់ដេវ៉ា, ព្រះខ័នរាជស្វាយរៀង, ភ្នំពេញក្រោន, អង្គរថាយហ្គឺរ និង អាយអេសអាយដង្កោសែនជ័យ កំពុងស្ថិតនៅក្នុងតំបន់មានឱកាសខ្លាំងបំផុត សម្រាប់ឡើងទៅវគ្គបន្ដ ខណៈដែល ការប្រកួតសប្ដាហ៍ក្រោយ ជាការប្រកួត សន្សំពិន្ទុចុងក្រោយ មុនបិទរដូវកាល ក្រុមទាំងអស់ត្រូវប្រឹងប្រែងឱ្យបានខ្លាំង ព្រោះគ្រប់ពិន្ទុទាំងអស់អាចសម្រេចវាសនាថា តើក្រុមណាខ្លះនឹងឆ្លងកាត់ទៅ វគ្គផ្ដាច់ព្រ័ត្រនិងក្រុមណាខ្លះត្រូវបញ្ចប់ដំណើរត្រឹមនេះ។

ចំណែកឯ តារាងពិន្ទុសប្ដាហ៍ទី១០ អ៊ីខេមបូឌានព្រីមៀរលីគ (Mobile) ក៏បានបង្ហាញក្រុមច្បាស់លាស់ដូចគ្នា សម្រាប់ការប្រជែងកៅអី ៦ ក្រុមចុងក្រោយ ដែលនឹងមានសិទ្ធិឡើងទៅវគ្គផ្ដាច់ព្រ័ត្រ​ ។

បច្ចុប្បន្ន ភ្នំពេញក្រោន កំពុងឈរនាំមុខតារាង ដោយរកបាន ១៦ ពិន្ទុ ពី ៧ ប្រកួត ខណៈ ណាហ្គាវើលដ៏ និង កងយោធពលខេមរភូមិន្ទ កំពុងដេញតាមយ៉ាងប្រកៀកប្រកិត ជាមួយ ១៥ ពិន្ទុដូចគ្នា។

ចំណាត់ថ្នាក់លេខ ៤ ដល់ ៦ រួមមាន ព្រះខ័នរាជស្វាយរៀង, អឹមអូអាយ កំពង់ដេវ៉ា និង អាយអេសអាយដង្កោសែនជ័យ ដែលកំពុងនៅតែស្ថិតក្នុងតំបន់មានឱកាសឡើងទៅវគ្គផ្ដាច់ព្រ័ត្រ ដូចគ្នា ប៉ុន្តែពិន្ទុមិនសូវឆ្ងាយពីក្រុមខាងក្រោមឡើយ។ ខណៈដែល ការប្រកួតសប្ដាហ៍ក្រោយ ជាការប្រកួត សន្សំពិន្ទុចុងក្រោយ ក្រុមនៅលេខ ៧ ដល់ ៨ ដូចជា បឹងកេត និង អង្គរថាយហ្គឺរ នៅតែមានឱកាសប្រជែង បើអាចរកលទ្ធផលល្អបាន។

សរុបមក សប្ដាហ៍ចុងក្រោយ នៃ អ៊ីខេមបូឌានព្រីមៀរលីគ ទាំង២វិញ្ញាសារ Console និង Mobile គឺជាសប្ដាហ៍សម្រេចវាសនា ព្រោះគ្រប់ពិន្ទុទាំងអស់ អាចផ្លាស់ប្តូរបញ្ជី ៦ ក្រុមឡើងទៅវគ្គផ្ដា់ព្រ័ត្រ បានគ្រប់ពេល ។

សូមរំឭកថា សម្រាប់​ការប្រកួតពានរង្វាន់អេឡិចត្រូនិច អ៊ីខេមបូឌានព្រីមៀរលីគ រដូវកាលទី១ ឆ្នាំ២០២៣-២៤ និងរដូវ​កាល​ឆ្នាំ២០២៤-២៥ ​ម្ចាស់​ជើងឯក បាន​ទៅ​លើកីឡាករ ទឹម វង្សរ៉ាវុទ្ធ (Tim Vongravuth) របស់ក្លិបបាល់ទាត់ណាហ្គាវើលដ៍ ដោយកាលពីរដូវកាលទី១ បានយក​ឈ្នះ​លើក​កីឡាករ កីឡា​ករ មុត លី របស់ក្រុម​ព្រៃវែង ខណៈរដូវកាលឆ្នាំ២០២៤-២៥ កន្លងទៅបានយកឈ្នះលើកីឡាករ ខេម សុងហៃ របស់ក្រុមបឹងកេត នៅវគ្គផ្តាច់ព្រ័ត្រ ៕