មូលនិធិ យុទ្ធនាការ CPL Cares តាមរយៈសកម្មភាព ការផ្សព្វផ្សាយមនុស្សធម៌ (Humanitarian Outreach) របស់ខេមបូឌានព្រីមៀរលីគ នឹងមានយុទ្ធនាការរៃអង្គាសថវិកា និងសម្ភារៈប្រើប្រាស់ តាមបណ្ដាកីឡដ្ឋានរបស់ក្លិបបាល់ទាត់ទាំងអស់ (Host Team) ដែលចូលរួមក្នុងការប្រកួតជម្រើសជើងឯក ខេមបូឌានព្រីមៀរលីគ រដូវកាល ២០២៥/២៦ សម្រាប់ការប្រកួតនាពេលបច្ចុប្បន្ននេះ។ គោលបំណងសំខាន់នៃការរៃអង្គាសថវិកា និងសម្ភារៈប្រើប្រាស់ ឬសម្ភារៈសិក្សានេះ គឺដើម្បីជួយឧបត្ថម្ភគាំទ្រដល់បងប្អូនជនភៀសសឹកដែលទទួលរងផលប៉ះពាល ដោយសារការប៉ះទង្គិចគ្នានៅតាមបន្ទាត់ព្រំដែនកម្ពុជា–ថៃ ដែលកំពុងត្រូវការជំនួយជាបន្ទាន់។

តាមរយៈស្តង់បរិច្ចាគនៅតាមកីឡដ្ឋាននៅថ្ងៃប្រកួត បងប្អូន អ្នកគាំទ្រទាំងអស់អាចនាំយកស្បៀង សម្ភារៈប្រើប្រាស់ប្រចាំថ្ងៃ មកចូលរួមបរិច្ចាគបាន ដូចជា៖ អង្ករ សម្លៀកបំពាក់កីឡា ឬសម្លៀកបំពាក់ទូទៅ សម្ភារៈសិក្សា សៀវភៅ បិច ឬសម្ភារៈក្មេងលេង ជាដើម។ សម្ភារៈទាំងនេះ បងប្អូនអាចនាំយកមកបរិច្ចាគនៅស្តង់បរិច្ចាគបានជារៀងរាល់ការប្រកួតរបស់ CPL ពោលគឺជារៀងរាល់ថ្ងៃសៅរ៍ និងអាទិត្យ ឬមានការជូនដំណឹងនៅលើគេហទំព័រក្រុមហ៊ុន ខេមបូឌានព្រីមៀរលីគ។ ចំណែកគ្រប់ការប្រកួតរបស់ខេមបូឌានព្រីមៀរលីគ នឹងបង្កើនចំនួនអ្នកថែរក្សាសុវត្ថិភាពបន្ថែម ដើម្បីរក្សា និងគ្រប់គ្រងសណ្ដាប់ធ្នាប់ ក៏ដូចសុវត្ថិភាព សម្រាប់អ្នកគាំទ្រទាំងអស់ដែលទៅទស្សនាការប្រកួតរបស់យើងនៅគ្រប់កីឡដ្ឋាន។

ក្នុងនាមជាលីគ ខេមបូឌានព្រីមៀរលីគ ប្តេជ្ញារួមចំណែកក្នុងការជួយការងារសង្គម ការងារសប្បុរសធម៌ និងអំពាវនាវឱ្យអ្នកស្រលាញ់បាល់ទាត់ទាំងអស់ ចូលរួមក្នុងកម្មវិធីមនុស្សធម៌នេះផងដែរ។ រាល់ការបរិច្ចាគរបស់អ្នកទាំងអស់គ្នា គឺជាចំណុចសំខាន់ដែលបង្ហាញអំពីការសាមគ្គីគ្នា កសាងសង្គមមួយដ៌រឹងមាំ សម្រាប់ប្រជាជនយើង និងប្រទេសកម្ពុជាទាំងមូល ស្របតាមពាក្យស្លោករបស់យុទ្ធនាការ CPL Cares  ទាំងអស់គ្នាដើម្បីគ្រួសារយើង, ប្រជាជនកម្ពុជា និងសហគមន៍ដ៌រឹងមាំ៕