គិតត្រឹមសប្ដាហ៍ទី ១២ នៃការប្រកួតជម្រើសជើងឯក ខេមបូឌានព្រីមៀរលីគ ឆ្នាំ២០២៥/២៦ កីឡដ្ឋានរបស់ក្លិបទាំងអស់នៅលីគកំពូលកម្ពុជា បានទាក់ទាញអ្នកទស្សនាការប្រកួតផ្ទាល់សរុប ៦៤,៥៧៣ នាក់។ ក្នុងចំណោមនេះ សប្ដាហ៍ទី ២ ជាសប្ដាហ៍ដែលមានអ្នកទស្សនាច្រើនបំផុត រហូតដល់ចំនួន ១១,០៤៩ នាក់។ បើប្រៀបធៀបជាមួយរដូវកាលមុន ពោលគឺ ឆ្នាំ២០២៤/២៥ តួលេខនេះកើនឡើងប្រមាណ ៦,០០០ នាក់ ព្រោះនៅរដូវកាលមុន សប្ដាហ៍ទី២ មានអ្នកទស្សនាសរុបត្រឹម ៤,៧០០ នាក់ប៉ុណ្ណោះ។

បើក្រឡេកមើលតួលេខអ្នកទស្សនាផ្សាយបន្តផ្ទាល់តាមបណ្តាញសង្គម Facebook គិតត្រឹមសប្ដាហ៍ទី ១២ ក៏មានការកើនឡើងដូចគ្នា។ ចំនួនអ្នកទស្សនាផ្ទាល់ (Live Viewers) សរុបមានប្រមាណ ១,០៣១,០០០ នាក់។ ខណៈដែលចំនួនអ្នកទស្សនាបន្ទាប់ពីបញ្ចប់ការផ្សាយបន្តផ្ទាល់ក្នុងរយៈពេលមួយថ្ងៃ (24-Hour Views) កើនដល់ ៧,២០៨,២០០ នាក់។ សរុបអ្នកទស្សនាទូទៅ (Total Reach/Views) មានប្រមាណ ៤៥,៥៣២,០០០ នាក់។

កម្លាំងអ្នកគាំទ្រគឺជាចំណុចសំខាន់សម្រាប់ការរីកចម្រើនរបស់បាល់ទាត់កម្ពុជា។ ដូច្នេះ សូមអ្នកគាំទ្រទាំងអស់អញ្ជើញចូលរួមគាំទ្រការប្រកួតជម្រើសជើងឯក ខេមបូឌានព្រីមៀរ លីគ រដូវកាល ២០២៥/២៦ ដើម្បីរួមចំណែកលើកកម្ពស់ក្លឹបបាល់ទាត់ក្នុងស្រុកឱ្យកាន់តែរឹងមាំ និងជំរុញសមត្ថភាពប្រកួតប្រជែងរបស់កីឡាករខ្មែរ នៅលើវេទិកាអន្តរជាតិ។ ការគាំទ្ររបស់អ្នក គឺជាកម្លាំងធំដ៏មានតម្លៃសម្រាប់អនាគតបាល់ទាត់កម្ពុជា៕