ក្រុមហ៊ុនខេមបូឌានព្រីមៀរលីគ នឹងរៀបចំការប្រកួតបាល់ទាត់មិត្តភាពភាគីពាក់ព័ន្ធ ឬ CPL Stakeholders Friendly Match របស់ក្រុមហ៊ុនខេមបូឌានព្រីមៀរលីគ សម្រាប់រដូវកាលថ្មី ឆ្នាំ២០២៥នេះនឹងប្រព្រឹត្តិនៅថ្ងៃសៅរ៍ ទី២៦ ខែកក្កដា ឆ្នាំ២០២៥ នាកីឡដ្ឋាន អាគីហ៊ីរ៉ូ កាតូ នៃទឹកដីខេត្តសៀមរាប ចាប់ពីម៉ោង: 17:00 តទៅ។

ព្រឹត្តិការណ៍ប្រកួតបាល់ទាត់មិត្តភាពភាគីពាក់ព័ន្ធរបស់ក្រុមហ៊ុនខេមបូឌានព្រីមៀរលីគ ក្រោមកិច្ចសហការគ្នារវាង ក្រុមហ៊ុនខេមបូឌានព្រីមៀរលីគ ជាមួយនឹងក្លិបបាល់ទាត់អង្គរថាយហ្គឺរ ក្រោមអធិបតីភាពដ៏ខ្ពង់ខ្ពស់ ពីឯកឧត្តម ប្រាក់ សោភ័ណ អភិបាល នៃគណៈអភិបាលខេត្តសៀមរាប ក្នុងគោលបំណងផ្សព្វផ្សាយពីលីគកំពូលកម្ពុជា ទៅកាន់សាធារណជន អ្នកគាំទ្រ និងអ្នកស្នេហាវិស័យកីឡាបាល់ទាត់កម្ពុជាទាំងអស់ ឲ្យបានកាន់តែទូលំទូលាយ និងបង្កើនទំនាក់ទំនងកិច្ចសហប្រតិបត្តិការល្អ រវាងភាគីពាក់ព័ន្ធរបស់ក្រុមហ៊ុនខេមបូឌានព្រីមៀរលីគ ផងដែរ។ ការរៀបចំការប្រកួតបាល់ទាត់មិត្តភាពនេះ គឺជាជំហានឆ្ពោះទៅដំណើរការអភិវឌ្ឍ លីគបាល់ទាត់កម្ពុជា ជាពិសេស ដើម្បីជាការរួមចំណែកផ្សព្វផ្សាយអំពីសក្តានុពលនៃវិស័យទេសចរណ៍ខេត្តសៀមរាបកាន់ភ្ញៀវទេសចរជាតិ និងអន្តរជាតិផងដែរ។

គួរឱ្យដឹងផងដែរថា ព្រឹត្តិការណ៍ប្រកួតបាល់ទាត់មិត្តភាពភាគីពាក់ព័ន្ធរបស់ក្រុមហ៊ុនខេមបូឌានព្រីមៀរលីគ នេះជាលើកទី២ ហើយដែលក្រុមហ៊ុនខេមបូឌានព្រីមៀរលីគរៀបចំឡើង ក្រោយការរៀបចំយ៉ាងជោគជ័យកាលពីឆ្នាំ២០២៤ ដោយមានការចូលរួមយ៉ាងច្រើន ពីសំណាក់ ឯកឧត្តម លោកជំទាវ លោក លោកស្រី ដែលជាថ្នាក់ដឹកនាំ អ្នកផលិតមាតិកា និងថ្នាក់ដឹកនាំក្លិបទាំងអស់នៅប្រទេសកម្ពុជា។ 

សូមបងប្អូនចូលរួមគាំទ្រឱ្យបានច្រើនកុះករទាំងអស់គ្នា៕