ការប្រកួតជម្រើសជើងឯក ខេមបូឌានព្រីមៀរលីគ ឆ្នាំ២០២៤/២៥  បានបិទបញ្ចប់ដោយជោគជ័យនៅថ្ងៃទី១៨ ខែឧសភា ឆ្នាំ២០២៥ នៅសប្ដាហ៍ចុងក្រោយ ដែលមានក្រុមព្រះខ័នរាជស្វាយរៀង ជាម្ចាស់ជើងឯករដូវកាលនេះ ហើយក៏ជាលើកដំបូងផងដែរ ដែលមានអ្នកចូលរួមទស្សនាផ្ទាល់សរុបប្រមាណជា ១១,០៤៩ នាក់ សរុបទាំង៥ កីឡដ្ឋាន។ 
 

បន្ទាប់ពីឆ្លងកាត់ការប្រកួតរយៈពេល៣២សប្ដាហ៍  ពោលគឺចាប់ពីថ្ងៃទី១០ ខែសីហា ឆ្នាំ២០២៤ ដល់ថ្ងៃទី១៨ ខែឧសភា ឆ្នាំ២០២៥  ដែលមាន១១ក្រុមចូលរួមប្រកួតនៅរដូវកាលនេះ។  ក្រុមព្រះខ័នរាជស្វាយរៀងបានក្លាយជាម្ចាស់ពានរង្វាន់ជម្រើសជើងឯកខេមបូឌានព្រីមៀរលីគ ដោយពួកគេអាចរកបាន៧៦ពិន្ទុ ចំណែកឯភ្នំពេញក្រោន ជាម្ចាស់ជើងឯករង ដោយរកបាន៧២ពិន្ទុ ។ ចំណែកឯចំណាត់លេខ៣ បានទៅលើក្លិបវិសាខា មាន៦៥ពិន្ទុ និងលេខ៤ យកបានដោយក្លិបបឹងកេតមាន៤៣ពិន្ទុ និងលេខ៥ បានទៅលើក្លិបណាហ្កាវើលដ៍ មាន៤៣ពិន្ទុ ដោយយោងទៅតាមផលសងគ្រាប់បាល់។ ចំណែកឯក្រុមខ្លាទឹកក្រូចអង្គរថាយហ្គឺរ ទទួលបានចំណាត់លេខ៦ ដែលមាន៤០ពិន្ទុ ។ ទាំងនេះគឺជាលទ្ធផលចំណាត់ថ្នាក់ សម្រាប់ក្រុមកំពូលទាំង៦ ។ 

ចំណែកឯលទ្ធផលចំណាត់ថ្នាក់ ក្រុមខាងក្រោមទាំង៥ រួមមាន៖ អាយ អេស អាយ ដង្កោសែនជ័យ មាន៤២ពិន្ទុ ទទួលបានចំណាត់ថ្នាក់ទី៧។ ចំណែកឯលេខ៨ បានទៅលើក្លិប កងយោធពលខេមរភូមិន្ទ មាន៣៧ពិន្ទុ លេខ៩ បានទៅលើ គិរីវង់សុខសែនជ័យ មាន១៩ពិន្ទុ  លេខ១០ ឡាយហ្វ ខេត្តព្រះសីហនុ មាន១៧ពិន្ទុ និងលេខ១១ បានទៅលើក្លិបសមាគមកីឡាបាល់ទាត់ក្រសួងមហាផ្ទៃ ដែលពួកគេរកបានត្រឹម៨ពិន្ទុប៉ុណ្ណោះ ។

សូមអរគុណ អ្នកគាំទ្រទាំងអស់ដែលបានចូលរួមទស្សនាការប្រកួត នៅខេមបូឌានព្រីមៀរលីគតាំងពីដើមរដូវកាល រហូតដល់បិទបញ្ចប់រដូវកាល។ ការប្រកួតជម្រើសជើងឯក ខេមបូឌានព្រីមៀរលីគ ឆ្នាំ២០២៥/២៦ នឹងត្រឡប់មកវិញឆាប់ៗនេះ ៕