ព្រះខ័នរាជស្វាយរៀង ត្រូវទទួល Shan United សារជាថ្មីនៅថ្ងៃទី ០៦ ខែមីនា ឆ្នាំ២០២៥ នៃការប្រកួតពានរង្វាន់ AFC Challenge League 2024/2025 វគ្គ៨ក្រុមចុងក្រោយជើងទី១ នាពហុកីឡដ្ឋានជាតិមរតកតេជោ វេលាម៉ោង ៧:០០នាទីយប់។

ព្រះខ័នរាជស្វាយរៀងបានត្រៀមខ្លួនយ៉ាងល្អប្រសើរដោយនាំចូលកីឡាករបរទេសល្អៗ មកចូលរួមក្រុមផងដែរ។ បច្ចុប្បន្ន ក្រុមតំណាង​កម្ពុជា មានកីឡាករបរទេសចំនួន៧នាក់ ដើម្បីជួយក្នុងព្រឹត្តិការណ៍នេះរួមមាន ដូចជា៖ Gabriel Silva, Cristian Roque, Breno Caetano, Matheus Moresche, Takashi Odawara, Ryo Fuji និង Bounphachan Bounkong ខណៈដែលក្រុម Shan United ក៏មិនធម្មតានោះដេរ ដោយពួកគេទើបតែឈ្នះ Hantharwady United ៤ទល់០ ​លើក​ពានរង្វាន់​លីគ​កំពូល​មីយ៉ាន់ម៉ា​ទី៦ថ្មី​ៗរបស់ខ្លួន​ ហើយពេលនេះ Shan United ក៏បាន​ធ្វើ​ដំណើរ​មក​ដល់​ប្រទេស​កម្ពុជាកាលយប់មិញ​នេះ​ផងដែរ។

ក្រុមទាំង២ធ្លាប់ជួបគ្នាកាលពីខែកុម្ភៈម្ដងរួចមកហើយនាពហុកីឡដ្ឋានជាតិអូឡាំពិក ដោយព្រះខ័នរាជស្វាយរៀងបានយកឈ្នះក្នុងលទ្ធផល ៤ទល់២ នៃការប្រកួត​ AFF Asean Club Champion Ship វគ្គជម្រុះក្នុងពូល។​

គួរឱដឹងផងដែរថា ព្រះខ័នរាជស្វាយរៀង ​បានទទួលការយល់ព្រម​ពី​​សហព័ន្ធ​បាល់​ទាត់អាស៊ី (AFC) ក្នុងការប្រើ​ពហុកីឡដ្ឋានជាតិមរតកតេជោ ជាទឹកដី​ទទួល​​ក្រុម​ភ្ញៀវ។ ព្រះខ័នរាជស្វាយរៀង នឹងត្រូវប្រកួតជាមួយ Shan United ជើងទី១ នៅ​​ថ្ងៃទី០៦ ខែមីនា ​និងជើងទី២ នៅថ្ងៃទី១៣ ខែមីនា ឆ្នាំ២០២៥ ៕