ការប្រកួតជម្រើសជើងឯកខេមបូឌានព្រីមៀរលីគ ឆ្នាំ២០២៤/២៥ សប្ដាហ៍ទី៤បានបញ្ចប់រួចរាល់ហើយកាលពីរាត្រីថ្ងៃអាទិត្យ ម្សិលមិញនេះ ក្នុងនោះយើងឃើញមាន៣ក្រុមដែលមិនស្គាល់ពាក្យថាចាញ់ក្រោយឆ្លងកាត់៤សប្ដាហ៍ រួមមាន៖ ភ្នំពេញក្រោន ណាហ្គាវើល និង អង្គរថាយហ្គឺរ ។

ភ្នំពេញក្រោន ណាហ្គាវើលដ៍ និងអង្គរថាយហ្គឺរ កំពុងតែបង្ហាញនូវភាពខ្លាំងក្លារបស់ពួកគេនៅរដូវកាលថ្មីនេះ ដោយពួកគេសុតតែមិនស្គាល់ពាក្យថាចាញ់ ដោយ៤ ប្រកួតរបស់ភ្នំពេញក្រោន ក្រោមការដឹកនាំរបស់លោក OLEG STARYNSKYI ឈ្នះវិសាខា ៤ទល់២, ឈ្នះ Tiffy Army ២ទល់១ ឈ្នះបឹងកេត ២ទល់១ និងឈ្នះគីរីវង្ស ៦ទល់0 ចំណែកឯ ៣ ប្រកួតរបស់ណាហ្គាវើលដ៍ ក្រោមការដឹកនាំរបស់លោក ឃឹម បុរី ឈ្នះគីរីវង្ស ២ទល់១, វិសាខា ១-០ និងឈ្នះបឹងកេត ៣ទល់១ និង ៣ប្រកួតរបស់អង្គរថាយហ្គឺរ ក្រោមការដឹកនាំរបស់លោក Kota Miyagi ឈ្នះក្រសួងមហាផ្ទៃ ១ទល់០, ឈ្នះ Tiffy Army ២ទល់១ និងឈ្នះអាយអេសអាយ ២ទល់០ ទៀត ។

គួរឱ្យដឹងផងដែរថា តារាងចំណាត់ថ្នាក់សប្ដាហ៍ទី៤បច្ចុប្បន្ន ភ្នំពេញក្រោន ឈរកំពូលតារាង ក្រោយពីឈ្នះ ៤ ប្រកួតជាប់ៗគ្នាមាន ១២ពិន្ទុពេញ ស្របពេលក្រុមការពារតំណែងឯក ព្រះខ័នរាជស្វាយរៀង ធ្លាក់មកលេខ ២ វិញ ក្រោយចាញ់វិសាខា ១ទល់០ ខណៈដែលណាហ្គាវើលដ៍ស្ថិតនៅលេខរៀងទី ៣ និងអង្គរថាយហ្គឺរ លេខរៀងទី ៤ ដោយមាន ៩ពិន្ទុដូចគ្នា និងសល់ម្នាក់១ប្រកួតក្នុងដៃ៕