ការប្រកួតជម្រើសជើងឯកខេមបូឌានព្រីមៀរលីគ ឆ្នាំ២០២៤/២៥ ចាប់ផ្ដើមបន្ដសប្ដាហ៍ទី៤នៅចុងសប្ដាហ៍ថ្ងៃសៅរ៍នេះហើយ ក្រោយពីសម្រាក២សប្ដាហ៍ សម្រាប់ក្រុមជម្រើសជាតិ។

ក្នុងនោះការប្រកួតថ្ងៃសៅរ៍ មាន៣ប្រកួតម៉ោងដំណាលគ្នា រួមមាន៖ សេះមាសវិសាខា ទទួលក្រុមខ្លាំងព្រះខ័នរាជស្វាយរៀង វេលាម៉ោង ៦:០០ នាទីល្ងាច នាកីឡដ្ឋានព្រីនស៍ បឹងកេត បើកទ្វារពហុកីឡដ្ឋានជាតិ អូឡាំំពិជ ទទួលណាហ្គាវើលដ៏ វេលាម៉ោង ៦:០០នាទីល្ងាច និងមួយគូទៀត កងយោធពលខេមរភូមិន្ទ ត្រូវទទួលក្រុមឡាយហ្វ ខេត្តព្រះសីហនុ ៦:០០នាទីល្ងាច នាកីឡដ្ឋានកងយោធពលខេមរភូមិន្ទ។

ចំណែកឯថ្ងៃអាទិត្យ មាន២គូ គិរីវង់សុខសែនជ័យ ទទួលក្រុមសិង្ហក្រហមភ្នំពេញក្រោន វេលាម៉ោង ៣:៣០ នាទីរសៀល នាកីឡដ្ឋានគិរីវង់សុខសែនជ័យ និងគូចុងក្រោយ អាយអេសអាយដង្កោសែនជ័យ ត្រូវទទួលក្រុមមកពីសៀមរាប អង្គរថាយហ្គឺរ វេលាម៉ោង ៦:០០នាទីល្ងាច នាកីឡដ្ឋាន AIA Stadium, KMH Park ។ 

សូមរំលឹកអោយដឹងផងដែរថា ឆ្លងកាត់៣សប្ដាហ៍ ក្រុមព្រះខ័នរាជស្វាយរៀង បន្ដឈរកំពូលតារាងមាន ៩ពិន្ទុ មានគ្រាប់បាល់ចំណេញ ១៥គ្រាប់, លេខ២ ភ្នំពេញក្រោន មាន៩ពិន្ទុ មានគ្រាប់បាល់ចំណេញ ៤គ្រាប់, លេខ៣ ណាហ្គាវើលដ៏ មាន៦ពិន្ទុ មានគ្រាប់បាល់ចំណេញ ៣គ្រាប់ និងលេខ៤ អង្គរថាយហ្គឺរ មាន៦ពិន្ទុ មានគ្រាប់បាល់ចំណេញ ២សល់១ប្រកួតក្នុងដៃដូចគ្នា​៕